पिण्डेश्वर विद्यापीठ शास्त्री (स्नातक) तहमा प्राच्य (संस्कृत) विषयतर्फ– शुक्लयजुर्वेद, न्याय, व्याकरण, साहित्य, ज्योतिष, धर्मशास्त्र तथा आधुनिक विषयतर्फ– नेपाली, अङ्ग्रेजी, अर्थशास्त्र, राजनीतिशास्त्र र आचार्य (स्नातकोत्तर) तहमा व्याकरण र साहित्य विषयको अध्यापन गर्ने पूर्वी नेपालको जेठो शैक्षिक केन्द्र हो । हाल यो नेपाल संस्कृत विश्वविद्यालयको आङ्गिक विद्यापीठका रूपमा सेवारत छ । यो विद्यापीठ सुनसरी जिल्लाको धरान उपमहानगरपालिका वार्ड नं. १४ विजयपुरमा अवस्थित छ । वि.सं. २००४ मा धरान सिंहदेवी मन्दिरदेखि उत्तरतर्फ रहेको दुईधारे पाटीमा तत्कालीन शिक्षाप्रेमी महानुभावहरूको सक्रियतामा र पण्डित छविलाल पोख्रेलको नेतृत्वमा स्थापित श्रीराम संस्कृत पाठशालालाई पिण्डेश्वर मन्दिर परिसरमा स्थानान्तरण गर्ने निर्णय गरी तत्कालीन राजा त्रिभुवन वीरविक्रम शाहबाट वि.सं.२००८ मङ्सिर २७ गते पिण्डेश्वर महाविद्यालयको समुद्घाटन गरिएपछि यसले पिण्डेश्वर मन्दिरको पाटी (अट्टालिका) बाट पठनपाठन एवम् कार्यालयीय सेवा सुरु गरेको हो । टाढाबाट आउने विद्यार्थीलाई आवासको असुविधा भएपछि उनीहरूले यसै पाटीलाई छात्रावासका रूपमा समेत प्रयोग गरेको बुझिन्छ । यसरी तत्कालीन पिण्डेश्वर महाविद्यालय (हालको पिण्डेश्वर विद्यापीठ) को विधिवत् स्थापना भएको हो ।

संस्थापनाकालीन शिलालेख पढ्न यहाँ क्लिक गर्नुहोस् ।